هي فوضى .. مطارات و بلاد

هي ملاحظات بين ٣ مطارات مررت فيها بطريقي الى كندا, و سأقوم بتحديثها بشكل مستمر اذا أمكن. هذه الملاحظات هي  لتجربة شخصية.

هي ملاحظات ربما تعكس كيف البلد شغالة مش بس مطار، زي ما بقولوا “المطار مراية البلد”

$-مصر ” انت صبحت على مصر النهاردة– 

  •  في صرامة في تقديم الخدمات طبعا في استثناءات و “كله بتمنه يا باشا”
  • انت عبارة عن هدف للابتزاز من قبل موظفي المطار ليسترزقوا منك، حيزهقوك كلمة “كل سنة و انت طيب” ، و ازا ما فهمت لا يجد لابس الميري ان يطلب الحلاوة بكل صفاقة و ممكن يتنح و يهدد و يزهقك ازا ما دفعت
  • كل شيء ممكن ما دام حتخشخش جيبتك
  • خدمات غير موجودة عن قصد لالتهامك
  • الحمامات نظيفة باعتدال و موظف الحمامات بانتظارك عالباب مع محرمة و ابتسامة أسد شايف خروف
  • قبل ما تطلع الطيارة لكندا ، رح يجيك “رأفت الهجان ” ليتأكد انك مش مزور فيزا و رح يفتشوك و أطفالك و أغراضك ٢٠٠ الف مرة و برضة مش حيلاقوا حاجة

 

    ⏱⏱السعودية   تناظر الساعة و ليش مستعجل –

  •  ماشية بفعل الدعاء لا اكثر
  •  موظفين بختلفوا بين فظاظة بداوتهم و محاولة التمدن 
  • لازم يحسسوك انك بفيلم ابيض و اسود و ينزلوك من الطيارة و انت بتتمختر على درج الطيارة و تلفح وجهك برطوبة و شوب جدة
  • في اخلاق يمكن ملاحظتها و مباديء ملتزمين 
  • فيها، كاحترام خصوصية العائلة و تقديمها على العزابي حتى بأبسط لاشياء
  •  الحمامات مش نظيفة رغم وجود كادر للتنظيف بس شكلهم مش ملحقين لانها كمان بالطابور
  •  موظفي لجوازات ما زالوا يمروا بمرحلة التطور من تعامل مع دواب لتعامل مع بني ادم
  •  موظفي الخدمات الارضيّة شبيبة و حماس و موضة شعر و سكسوكة و بسمعولك ، بس ازا الشغلة فيها تعب سهل كتير يحولك على موظف تاني. و هات لاقي اللي بدور عليه زي الحمام المقطوعة ميته، بس معلومة استني وقت الصلاة و بتلقاه بالمصلى ! ان شاء المولى
  • قبل ما تطلع الطيارة على كندا ، موظف واحد بسالك عن الأوراق بطلع عليها و بشكرك و بقلك بالسلامة

 🎧🎧- الاردن “شايف نفسك برضه شايفة نفسي –

  • في صرامة في تقديم الخدمات طبعا الاستثناءات موجودة للقرابة و فيتامين واو
  • ، الخدمات موجودة كنوع انه هيو عنا بس من دون نفس . مثلا بصالة انتظار الكراون ، الاكل ما اله لا طعمة و صغير حجما،لولا انها نعمة الله لقلت عبارة عن بزقات بكل ما تعني الكلمة من قرف
  •  الحمامات نظيفة ، و موظف التنظيف بعطيك نظرة “نفسي بفلوسك و تفو عليك” او “شد علي كمان بس ما تعطيني اقل من دينار ولا احسب الله ما خلقك”
  •  موظفي الجوازات مش طايقين حالهم ، بعطيك ابتسامة غصب بس في وراه لوحة اهلًا و سهلا انت في الاردن
  • موظفي الخدمات الارضيّة شغيلة و على قدر الإمكان لطيفين
Advertisements

عمان.. ذكريات و مشاهدات

عمان زمان ، عمان بوظة دليس عالدوار الثاني و اول من قدم البوظة السكب، و بياع ذرة عشارع الاستقلال اللي كان زي شارع الاردن هالايام، و بياعات كوسة بلدية بخلدا. عمان مزارع الكوسا و الخيار بطول شارع الجاردنز. عمان مدينة الاهلي براس العين، واولاد مولعين السلكة بلعبوا فيها بالنزهة، عمان فول سوداني محمص من عم افريقي قطعت الحرارة أصابع ايديه.

داخليةعمان زمان مضاءة شوارعها بنيون ابيض. عمان دوار الداخلية اللي كان دوار دائري بوسطه تمثال ترأسه الكرة الارضية. عمان  اللي التكاسي للاغنياء، و السرفيس و الباص وسيلة نقل عائلية. عمان اللي كانت من انظف 5 عواصم عربية

عمان زمان لما حدائق الملك عبدالله مكان عائلي.. و مدينة الاشباح جد بتخوف

عمان لليوم، موظف الحكومة اللي ما سمع بقوانين منع التدخين بالاماكن العامة، و بعزم “مين بده سيكارة؟” عمان السرفيس اللي لسه بتركبه الام و بنتها و أكياس سوق منجو و البشارات مش مخلين وسع لراكب ثالث، و الحج مروح من شغله و حامل اكياس الخضرة و الفواكه،و شفير السرفيس لسه بستخدم نفس الجملة من 40 سنة ” ما في فراطة”، عمان كونترول الباص اللي بطالبك تركب “هالمستورة” محلك ، و ما بخلي فيها جزء ما بحلق فيه.

عمان.. لساتها الصبية الفلاحة اللي كل ما اجا موجة اغنياء جدد يحاولوا لطها بمكياج جديد، و لكن بالصباحات الندية، و ساعات الظهر الحارة، و ليالي الياسمين البلدي.. رح تشووف بسمة عمان